На адрас “Настаўніцкай газеты” рэгулярна паступаюць лісты ад класных кіраўнікоў. У сваіх разважаннях яны вельмі шмат увагі ўдзяляюць узаемаадносінам сям’і і школы, ролі бацькоў у адукацыйным працэсе. Напрамак даследаванняў правільны. Напрыклад, даказана, што акадэмічная паспяховасць вучня павышаецца на трэць, калі тата проста знаходзіцца побач падчас выканання дамашняга задання. Неабавязкова нават разбірацца ў фізіцы ці хіміі. Пра гэта і не толькі нам расказаў кіраўнік сацыяльна-асветніцкай арганізацыі “Бацькоўства” Аляксандр ВЯЛІЧКА.
— Аляксандр Генадзьевіч, наколькі актуальная праблема несвядомага бацькоўства для нашай краіны?
— Калісьці мы праводзілі простае даследаванне. Яго нельга лічыць рэпрэзентатыўным для цэлай краіны, але агульнае ўяўленне яно сфарміравала. Мы склалі маленькае апытанне і пагутарылі з падлеткамі пра іх стасункі з татамі. Атрымалі індэкс уцягнутасці бацькі ў жыццё дзіцяці — 4%. Калі груба абагульніць, толькі 4% бацькаў хоць неяк удзельнічаюць у жыцці дзяцей. А не так даўно Нацыянальны статыстычны камітэт пацвердзіў нашу ацэнку. Па яго даследаванні “Як мы выкарыстоўваем наш час”, бацька праводзіць з дзецьмі менш за 3% свайго часу.
